Naxçıvanda monopoliyaya son qoyulur və yeni şirkətlər artıq rəqabətə hazırlaşırlar. Asayis.Az xəbər verir ki, bu barədə hazırda Naxçıvanda olan Baku TV-nin əməkdaşı məlumat verib.
O qeyd edib ki, Naxçıvan daxilində yerləşən, Vasif Talıbovun ailə üzvlərinin olduğu bildirilən bir sıra böyük obyektlərin, hotellərin, restorların işçiləri çaşqınlıq içərisindədirlər.
Baku TV əməkdaşı qeyd edib ki, Naxçıvanda hər bir sahibkarın sadəcə bir işlə məşğul olmağına icazə verilirdi. Onun sözlərinə görə, indiyədək şəhər ərazisində yalnız “sarı taksi”lər fəaliyyət göstərib:
“Digər şəxslərin fərdi olaraq taksi fəaliyyəti ilə məşğul olması qadağan idi. Şirkət üzvləri rüsum ödədikləri halda avtomobilin bütün xərclərinin, məsuliyyətinin öz üzərlərində olduğundan şikayətçidirlər. Onlar bu şirkətin Vasif Talıbovun oğullarından birinə məxsus olduğunu qeyd ediblər”.