İcra Hakimiyyəti 2 il əvvəl istifadəyə verilən məktəbin tikintisinə indi icazə verir?

Quba Rayon İcra Hakimiyyəti Quba rayonu Zərdabi qəsəbəsi Bayram Şıxəmirov adına 850 şagird yerlik tam orta məktəb binasının tikintisinə icazə verib.

Asayis.Az Yeniavaz.com-a istinadən xəbər verir ki, bu barədə məlumat Tikintilərin Dövlət Reyestrində yerləşdirilib.

Məlumatda göstərilir ki, Quba Rayon İcra Hakimiyyəti orta məktəb binasının tikintisinə 18 sentyabr 2023-cü il tarixli 04 saylı sənəd əsasında icazə verib.
Açıqlanan məlumatlarda göstərilir ki, 10 avqust 2023-cü il tarixində şəhərsalma sənədlərinə uyğunluq barədə 3-35-2/2-2576/2023 saylı, həmçinin 24 fevral 2020-ci il tarixində tikinti layihəsinə dair 28966 saylı ekspertiza rəyləri verilib.

Bildirilir ki, tikintisinə icazə verilən orta məktəb binasının tikinti sahəsi 3 min 543 kv. metr, ümumi sahəsi 8 min 784,59 kv. metr, mərtəbələrinin sayı isə 3 (+zirzəmi) olacaq.



Məlumat üçün bildirək ki, 24 fevral 2020-ci il tarixində tikinti layihəsinə dair ekspertiza rəyinin verildiyi orta məktb binasının söküntüsü 2019-cu ildə həyata keçirilib. 2019-cu ili sentyabr ayında mətbuatda yayılan məlumatlardan belə görünür ki, məktəbdə söküntü işləri həyata keçirilir.

Tikinti layihəsinə dair ekspertiza rəyinin verildiyi tarixdən 4 gün əvvəl – 20 fevral 2020-ci il tarixində isə Elm və Təhsil Nazirliyinin yaydığı məlumatda göstərilir ki, məktəbin tikintisinə başlanılıb.

Elm və Təhsil Nazirliyinin 11 oktyabr 2021-ci il tarixində yaydığı məlumatda isə qeyd olunur ki, Quba rayonu Zərdabi qəsəbəsində 850 şagird yerlik məktəb binası istifadəyə verilib.