“Bakı nəhayət, Qarabağ məsələsinə nöqtə qoymaq qərarına gəlib” - Rusiyalı ekspert

“Azərbaycanın Qarabağda antiterror əməliyyatı keçirməsi qərarı gözlənilən idi. Çünki rəsmi Bakının səbir kasası daşmışdı”.

Asayis.Az xəbər verir ki, bunu APA-nın Moskva bürosuna müsahibəsində rusiyalı hərbi-siyasi analitik Yevgeni Mixaylov bildirib.

“Azərbaycan Qarabağda xüsusi hərbi əməliyyat, antiterror əməliyyatı keçirmək qərarına gəlib. Bu gözlənilən idi. Çünki, İrəvan və Qarabağdakı qanunsuz erməni silahlı birləşmələri müntəzəm olaraq regionda, iki ölkənin sərhədində təxribatlara əl atırdılar. Bu gün isə Azərbaycanın Xocavənd rayonunda daxili işlər nazirliyinin əməkdaşlarına qarşı terror aktı həyata keçirilib. Bu hadisə rəsmi Bakının səbir kasasını daşıran son damla olub. Hesab edirəm ki, bütün bunlara Ermənistanı onun qərbli müttəfiqləri təhrik edir. Azərbaycan Rusiya tərəfini keçirdiyi antiterror əməliyyatı barədə xəbərdar edib. Çox güman ki, Azərbaycan tərəfi fəaliyyətində sülhməramlı kontingentlə razılaşdırmalar aparır. Bu razılaşdırmalar Qarabağın dinc erməni sakinlərinin təhlükəsizliyinin təmin olunması ilə bağlıdır. Azərbaycan tərəfi ancaq hərbi infrastruktura zərbələr endirir. Bakı nəhayət ki, bu məsələyə nöqtə qoymaq qərarına gəlib. Ermənistan 2020-ci ildə üçtərəfli razılaşmanı imzalamasına baxmayaraq faktiki onları icra etməyib. İrəvan regiona üçüncü oyunçuları cəlb etmək, Rusiyanın və onun sülhməramlı kontingentinin fəaliyyətini nüfuzdan salmaq üçün hər cür səy göstərib. Amerikalılarla birgə hərbi təlimlər keçirərək İrəvan müttəfiqinin kim olduğunu sübut edib. Bu isə nə Moskvanı, nə Bakını, nə də Tehranı qane edir”, - deyə Rusiyalı siyasi ekspert vurğulayıb.