İlk dəfə olaraq, azərbaycanlı Beynəlxalq Valyuta Fondunun daimi nümayəndəsi vəzifəsinə təyin edilib.
Asayis.Az Trend-ə istinadən bildirir ki, Fərid Siyavuş oğlu Talışlı BVF-nin Qırğızıstan Respublikasındakı daimi nümayəndəsi vəzifəsinə təyinat alıb.
Qeyd edək ki, Fərid Talışlı 1972-ci il oktyabrın 25-də Moskvada anadan olub. Azərbaycan Dövlət Neft Akademiyasının (indiki Azərbaycan Dövlət Neft və Sənaye Universiteti - red.) mühəndis-iqtisadçı fakültəsini, həmçinin, Azərbaycan Dövlət İqtisad Universitetinin beynəlxalq iqtisadi münasibətlər fakültəsini bitirib. 2006-cı ildə M.Lomonosov adına Moskva Dövlət Universitetində iqtisad elmləri namizədi alimlik dərəcəsi alıb.
Peşəkar fəaliyyətinə 1993-cü ildə Azərbaycan Mərkəzi Bankında başlayıb. 2003-2006-cı illərdə BVF-nin yerli ofisində işləyib. 2006-2009-cu illərdə Dünya Bankının Azərbaycan nümayəndəliyində iqtisadçı vəzifəsində çalışıb. 2010-cu ildən BVF-nin Vaşinqtondakı baş qərargahında işləyir.