Hökumətin tərkibi niyə dəyişməliydi ki... - Elmar Məmmədyarov

Nazirlər Kabinetinin yeni tərkibi bir müddət əvvəl təsdiqlənib. Əli Əsədov yenidən ölkənin Baş naziri təyin edilib. Kabinetin tərkibində yalnız iki məmur dəyişib. 

Ədliyyə naziri postunu tutan Fikrət Məmmədov və Dini Qurumlarla İş üzrə Dövlət Komitəsinin sədri Mübariz Qurbanlı vəzifələrini itirib. Onların əvəzinə müvəqqəti nazir və komitə sədri təyin olunub.

Məsələ ilə bağlı Modern.az-a danışan sabiq xarici işlər naziri Elmar Məmmədyarov bildirib ki, Nazirlər Kabineti üzvlərinin böyük əksəriyyətinin dəyişdirilməsinə ehtiyac yoxdur:

- “Qaşınmayan yerdən qan çıxarma”,- deyə yaxşı bir atalar sözü var. Hazırkı komanda işləyirsə, niyə onların əksəriyyətini dəyişmək lazımdır? İşləyən nazirlərin əksəriyyəti gənclərdir. Onlara öz fəaliyyətlərini davam etdirmək üçün şərait yaradılmalıydı. Azərbaycan Nazirlər Kabinetinin elə hazırkı fəaliyyəti dövründə Qarabağ zəfərinə nail oldu. Biz cənab İlham Əliyevin başçılığı altında işləyən hökuməti alqışlamalıyıq.

Sabiq nazir önümüzdəki 7 illə bağlı da danışıb:

- Artıq torpaqlar işğaldan azad olunub. Qarabağa böyük qayıdış həyata keçirilir. İndi əsas məsələ işğaldan azad edilmiş torpaqların inkişaf etdirilməsi ilə bağlıdır. Bu mühüm məsələdir. Orada böyük dağıntılar törədilib, hər şeyi yenidən qurub yaratmaq lazım gələcək.