"Ağ və qara tutun vitamin, minerallarla zəngin olması məlumdur. Tutun sağlamlığa göstərdiyi müsbət təsirlərinə görə onu bir aptekə bənzətmək olar".
Asayis.Az xəbər verir ki, bu barədə fitoterapevt Füzuli Hüseynov bildirib.
Onun sözlərinə görə, tutun immunitet sistemini gücləndirdiyini, anemiya və böyrəklərə xeyirli olduğunu danılmaz bir fakt kimi çox insan bilir:
"Tut eyni zamanda ağız və diş sağlamlığının təmin olunmasında və saçların canlandırılmasında çox böyük faydalara malikdir. Təbii yolla aparılan bitki müalicəsində tutun həm meyvə, həm şirəsi, həm də yarpaqlarından istifadə olunur. Tutun, əsasən qara və ağ növü çox işlədilir.
Ağ tutun meyvələri şirin, yeməlidir və C vitamini ilə zəngindir. Onun meyvəsi, bəkməzi, kompotu və cemi ürək zəifliyi, mədə-bağırsaq xəstəliklərinin müalicəsində son dərəcə faydalıdır. Ağ tut mədə və bağırsaqların nizamlı fəaliyyətini təmin edir. Onun yarpaqları qaynadılıb içilərsə, sidikqovucu təsir göstərir və bədəndə yığılmış suyu xaric edir. Acqarına yeyilən ağ tut bağırsaq qurdlarını azaldır. Tut həm də yorğunluq hissini azaltmağa kömək edir. Ən əsası, yaşlanmanı gecikdirir və dərini daha təravətli saxlayır, şəkər xəstəliyinin müalicəsində yaxşı təsir edir. Onun yarpaqları qanda şəkərin səviyyəsini aşağı salır".
Fitoterapevt qeyd edib ki, qara tut qanyaranmanı sürətləndirir, böyrək toxumasını qidalandırır, boğaz ağrısını, çiçək və qızılca xəstəliklərini sağaldır:
"Mədə və bağırsaqları gücləndirir, bağırsaqların peristaltikasını sürətləndirir, mikrofloranın tənzimlənməsində iştirak edir, sidikqovucu təsir göstərir. Qara tut suyu ilə hazırlanan ağız yuyucusu ağız iltihabı, diş əti iltihabı (gingivit), diş ətinin şişməsi, tonzillit və boğaz ağrısı üçün faydalıdır. Turş tut ağız yaralarının (aftanın) müalicəsi üçün çeynənir. Təbii antibiotik olaraq təsirini itirməyən tutun tərkibində kalium, fosfor, A və K vitamini var. Bu meyvə yüksək xolesterol, ürək və mədə xəstəlikləri üçün faydalıdır və qan şəkərini tənzimləyir. Bədəni toksinlərdən təmizləyən və həzm sistemini gücləndirən tut orqanizmi zərərli maddələrdən qoruyur. Dəri üçün də olduqca faydalıdır".
Həmçinin o qeyd edib ki, qırmızı və ağ tut cəmiyyətdə anemiya olaraq bilinən dəmir çatışmazlığı anemiyasının müalicəsində faydalıdır:
"Gündə 1 ovuc tut qanazlığını aradan qaldırır. Yaş artdıqca sümük inkişafında durğunluq yaranır. Yaşıl tərəvəz və meyvələr sümük inkişafını dəstəkləyir. Xüsusilə qırmızı və ağ tut sümük inkişafında çox faydalıdır.
O, infeksiya ilə mübarizə aparır və xəstəliklərdən qoruyur. Elmi tədqiqatlar giləmeyvələrin istehlakının xərçəng, yaşlanma və bakterial infeksiyalara qarşı potensial sağlamlıq təsirləri olduğunu göstərir, həmçinin, yaşlanma əleyhinə effekt göstərir. Tərkibindəki A vitamini sayəsində hüceyrələr yenilənir və dəri sağlamlığı qorunur".